वाई/पुणे : गुगलचा उदय होण्याआधी कित्येक वर्षांपासून मराठी वाचकांची ज्ञानाची भूक भागविणाऱ्या मराठी विश्वकोशाच्या वीस जाडजूड खंडांमधील माहितीचा सागर आता अवघ्या चार ‘एमबी’च्या मोबाइल अॅपमध्ये मोफत उपलब्ध झाला आहे. महाराष्ट्र राज्य विश्वकोश निर्मिती मंडळाने तयार केलेले विश्वकोश बदलत्या काळाची गरज लक्षात घेऊन मोबाइल अॅपच्या स्वरूपात उपलब्ध करण्यात आले आहेत. ‘बुकगंगा डॉट कॉम’ने विकसित केलेल्या या अॅपचे १२ जानेवारी २०१८ रोजी वाई येथे झालेल्या कार्यक्रमात लोकार्पण करण्यात आले.
मराठी भाषा संवर्धन पंधरवड्याच्या निमित्ताने मराठी विश्वकोश मंडळ आणि वाचन जागर अभियानाच्या संयुक्त विद्यमाने वाईमध्ये १२ ते १५ जानेवारी या कालावधीत ग्रंथप्रदर्शनाचे आयोजन करण्यात आले आहे. त्याचे उद्घाटन आणि विश्वकोश अॅपचे लोकार्पण असा कार्यक्रम १२ जानेवारी रोजी वाईतील महागणपती घाटावर झाला. त्या वेळी महाराष्ट्र राज्य मराठी विश्वकोश निर्मिती मंडळाचे अध्यक्ष दिलीप करंबेळकर, ‘बुकगंगा डॉट कॉम’चे सीईओ मंदार जोगळेकर, वाई नगरपालिकेच्या अध्यक्षा डॉ. प्रतिभा शिंदे, मराठी विश्वकोशाचे सहायक संपादक सरोजकुमार मिठारी, विश्वकोश मंडळाच्या सचिव सुवर्णा पवार, सहायक सचिव डॉ. जगतानंद भटकर आदी मान्यवर या वेळी उपस्थित होते.
गेल्या वर्षी मराठी राजभाषा दिनी (२७ फेब्रुवारी २०१७) महाराष्ट्र राज्य मराठी विश्वकोश निर्मिती मंडळ, ग्रंथाली आणि बुकगंगा डॉट कॉम यांच्या सहकार्याने हे खंड पेन ड्राइव्हमध्ये उपलब्ध करण्यात आले होते. त्यामुळे इंटरनेट नसलेल्या ठिकाणी, तसेच शाळांमध्येही त्याचा वापर करणे सहज शक्य झाले. त्यानंतर आता पुढचे पाऊल टाकून विश्वकोशाचे वीसही खंड अॅप स्वरूपात उपलब्ध करण्यात आले आहेत. ‘बुकगंगा डॉट कॉम’ने कॉर्पोरेट सोशल रिस्पॉन्सिबिलिटी उपक्रमांतर्गत हे अॅप मोफत विकसित करून दिले आहे. त्यामुळे मराठी जनांना माहितीचा सागर आता आपल्या मोबाइलमध्ये उपलब्ध झाला आहे.
विश्वकोशाच्या वीस खंडांतील ३१२ सूची आणि तब्बल १८ हजार १६३ लेखांचा यात समावेश आहे. ही सर्व माहिती युनिकोड स्वरूपात असल्याने आपल्याला हवा तो शब्द वापरून त्या संदर्भातील माहिती शोधणेही सहज शक्य आहे. सर्व मराठी भाषकांना आणि मराठी भाषेचा अभ्यास करणाऱ्या जगभरातील सर्वांनाच हे अॅप अत्यंत उपयुक्त ठरणार आहे.
(विश्वकोश अॅपच्या लोकार्पणप्रसंगी ‘बुकगंगा’चे सीईओ मंदार जोगळेकर यांनी अॅपची वैशिष्ट्ये सांगितली. त्याबद्दलचा व्हिडिओ सोबत देत आहोत.)